Hvað gerir kírópraktor?
Starf kírópraktorsins er að finna og leiðrétta hryggvandamál svo taugakerfið þitt geti starfað á hámarksgetu. Mundu að svæðið sem hefur misst eðlilega hreyfigetu slitnar hraðar en svæði sem hreyfist eðlilega og er stöðugt. Með því að koma eðlilegri hreyfigetu aftur á með réttum aðferðum getur líkaminn sem betur fer myndað smátt og smátt stöðugleika og stöðvað óeðlilegan slithraða. Kírópraktor flýtir hraða batans með því að koma á eðlilegu taugaflæði þannig að eðlilegt taugaflæði verði milli heilans og líkamans.
Kírópraktor meðhöndlar ekki eingöngu einkennin heldur kemur eðlilegu taugaflæði á aftur svo líkaminn geti gert það sem hann gerir best, lagað sig sjálfur. Þegar við fáum sár eða bein brotnar, hver lagar það? Líkaminn.
Öll meðferðaúrræði eiga rétt á sér og það er staðreynd að lyflækningar eru nauðsynlegar í alvarlegum veikindum og neyðartilfellum og geta þar af leiðandi bjargað lífum. Á hinn bóginn er kírópraktík nauðsynleg til að líkaminn geti starfað á besta mögulegan hátt með því að koma á eðlilegu taugaflæði þannig að líkaminn geti gert við sig sjálfur. Til að hámarka heilsu, vellíðan og til að fá sem mest út úr lífinu er kírópraktísk meðferð skynsamlegur kostur fyrir þig og fjölskyldu þína.
Börn og kírópraktík
Venjulegt fimm ára barn hefur dottið að meðaltali 2.000 sinnum og 200 þeirra eru talin alvarleg. Yfirleitt er ekki eitt atvik orsökin heldur mörg lítil óhöpp og slys.
Nýleg rannsókn sýnir fram á að við fæðingar sem þarfnast inngripa lækna með töngum, sogklukkum eða átaka höfðu 95% barna hlotið hálsmeiðsl. Það er því skynsamlegt að láta skoða barnið þitt snemma á lífsleiðinni.
Miðtaugakerfið
Miðtaugakerfið er samansett af heilanum og mænunni sem eru sífellt að meta stöðuna og viðhalda stöðugleika í líkamanum.
Heilinn er stjórnstöð líkamans sem stjórnar öllum aðgerðum og viðheldur þannig stöðugleika í líkamanum. Taugakerfið er samskiptanet sem tekur við og sendir skilaboð frá heilanum í gegnum mænuna til allra frumna í líkamanum.
Mænan er langur þykkur taugavefur sem liggur frá neðri hluta heilans og niður mænugöngin. Á leiðinni niður mænuna greinast taugar frá mænunni út um göt milli hvers hryggjarliðar. Þessar taugar skiptast aftur og aftur í minni taugaþræði sem tengjast hverri frumu, líffæri og vef í líkamanum og kallast úttaugakerfi. Líkaminn hefur um það bil 15 billjónir taugafruma sem senda og taka við skilaboðum frá mænunni.
Miðtaugakerfið okkar er gríðarlega viðkvæmt, en hvað verndar það? Hryggurinn.
Hryggurinn
Í hryggnum eru 24 hreyfanlegir hryggjarliðir, hver og einn starfar með næsta fyrir ofan og þeim næsta fyrir neðan. Brjósk er á milli allra hryggjarliða sem starfa sem dempari og býr til pláss á milli þeirra hryggjarliða svo pláss sé fyrir taugina.
Af hverju er heilbrigður hryggur svona mikilvægur? Jú, hann verndar mænuna og viðkvæman taugavefinn og gerir okkur kleift að beygja okkur, sveigja og hreyfa eðlilega án þess að skaða taugarnar.
Ef hryggjarliður hreyfist ekki eðlilega er oft talað um subluxation complex; óhreyfanleiki, skekkja, stífleiki, óeðlileg hreyfing.
Þegar tveir eða fleiri hryggjarliðir hreyfast ekki eðlilega og eða hafa misst eðlilega stöðu myndast þrýstingur á taugar sem truflar eðlilegt taugaflæði frá heilanum til líkamans og frá líkamanum til heilans.
Þrýstingur á taug
Rannsókn sem var gerð í Colarado-háskólanum sýnir fram á að það þarf aðeins 8–10 mercury-þrýsting til að minnka taugaflæði frá einni taug um allt að 60%. Það er um það bil þyngd einnar krónu.
Taugaþrýstingur getur verið til staðar án þess að við finnum fyrir því, það þýðir að taugaflæði til ákveðins líffæris getur verið skert um 60% án þess að við vitum af því, þarna tölum við um þögult liðskrið.
Vissir þú að minna en 10% af taugakerfinu nemur sársauka, þannig að oft þegar einkenni koma fram hefur taugaflæðið verið skert í mánuði eða jafnvel mörg ár? Þegar fólk fær hjartaáfall eða heilablóðfall þá finnur það ekkert fyrir því þegar æðarnar eru að stíflast og það veit ekki að eitthvað er að fyrr en það er orðið of seint.
Áhrif taugaklemmu
Ef taugaflæði til einhvers hluta líkamans er skert getur það að lokum leitt til einkenna sem er eina aðferð líkamans til að láta þig vita að eitthvað er að. Skoðum hrygginn. Ef eitthvað truflar taugaflæði í hálsinum getur það leitt til höfuðverkja, mígrenis, skerts ónæmiskerfis, ennisholuþrýstings, frjókornaofnæmis, svefnleysis, útbrots, skertrar heyrnar, hálskirtlabólgu, hósta, barkhósta eða verkja í höndum.
Í brjóstbakinu; astma, hjartatruflana, lungnakvefs, flensu, gallblöðrusjúkdóma, lifrasjúkdóma, blóðþrýstingsvandamála, meltingartruflana, brjóstsviða, magabólgu, skerts ónæmiskerfis, ofnæmis, nýrnasjúkdóma eða síþreytu.
Í neðra baki; harðlífis, túrverkja, næturþvagleka, hnéverkja, settaugabólgu, verkja í mjóbaki, lélegrar blóðrásar, bólginna ökkla, veikleika í fótum eða sinadráttar. Vá, ég er uppgefinn og þarna eru aðeins nefnd nokkur atriði.
Slit í hrygg
Hvað er að gerast þegar hryggjarliðir missa stöðu sína? Þegar hryggjarliðir missa stöðu sína geta þeir byrjað að sýna óeðlilegt slit á aðeins tveimur vikum. Þetta slit leiðir af sér örvef sem getur leitt til meiri örvefsmyndunar. Þetta ferli heldur áfram á meðan hreyfanleiki er ekki eðlilegur milli hryggjarliða, svona slit er unnt að koma í veg fyrir.
Hryggslit hefur ekkert með það að gera hversu gamall þú ert, þú getur verið sextíu ára og með fullkomlega heilbrigðan hrygg eða verið tíu ára og strax sýnt merki um hryggslit, það fer allt eftir því hvað á undan er gengið.
Lyf
Verkjalyf og bólgueyðandi lyf geta minnkað einkennin en þau leiðrétta ekki orsökina fyrir vandamálinu. Með því að leiðrétta ekki orsökina leyfum við vandamálinu að þróast til verri vegar og það endar með verri veikindum. Við vitum öll að ofnotkun lyfja getur leitt til verri aukaverkana, af hverju höldum við þá áfram að fylla líkamann af lyfjum og fela þannig orsök vandans?
Þú gætir verið að velta fyrir þér hvað orsakar liðskrið; garðvinna, íþróttir, tölvuvinna, þungun, röng líkamsbeiting, rifrildi, bætiefni í fæðu, eiturefni, fæðing eða léleg líkamsstaða og eru aðeins nefnd nokkur dæmi. Auk þess getur orsökin verið andleg eins og stress.